I ei ny tilråding til Folketingets helsekomité tilrår Det etiske råd i Danmark at surrogati skal gjerast meir tilgjengeleg.
Det danske lovverket har ikkje noko direkte forbod mot surrogati, men det er fleire reguleringar som gjer at surrogati i praksis er særs vanskeleg. Mellom anna er det ulovleg å få hjelp til behandlinga av helsepersonell – noko som Bioteknologirådet sin danske søsterorganisasjon no ønsker å endre på.
– Vi har oppdaga at vi i Danmark er for restriktive, noko som vi ikkje kan grunngi. Difor vil vi gjere det lettare for par å nytte seg av ei surrogatmor, som berre gjer det for å hjelpe paret, seier leier av Det etiske råd i Danmark, Leif Vestergaard Pedersen, til Danmarks Radio.
Det etiske råd peikar på at mellom 100 og 200 barn kjem til Danmark etter å ha blitt fødde av surrogatmødrer i utlandet. Ved å jamføre surrogati med andre former for assistert befrukting i den danske helsetenesta meiner rådet at praksisen vil bli både lettare og tryggare, samt redusere bruken av surrogati i utlandet.
– Etisk råd vil gjerne opne for at ei surrogatmor og eit par som ikkje kan få barn, heller får hjelp av den danske helsetenesta under ordna forhold, i staden for å reise til Spania for å gjere behandlinga der, seier Pedersen.
